طبيب للشعب المصرى ..خليكوا فى بيوتكم لاننا معندناش أماكن تاني لمصابين جدد

يحكى الدكتور عبد الرحمن خيرى الطبيب بمستشفى عزل اسنا مواقف مؤلمة عندما تقرأها يقشعر بدنك والدموع تنساب من عينك دونما تدرى ، فيقول عبدالرحمن عن هذة المواقف :

مريضه مسنه جايه مستشفي الحجر ومش معاها اي حاجه نوصل لاهلها بيها غير بطاقتها ولا تليفون نقول لاهلها انها اتحولت عندنا وهناخد وقت علشان نوصل والمريضه في حاله زعر تام وصدمه عصبيه.

اسره كامله محجوزه عندنا وأبوهم مات ومش قادرين نقولهم أنه سندهم ف الدنيا مات وأتدفن وأنتوا متعرفوش ولسه بتدعوا أنه يخف ويرجع بالسلامه 💔 …

حاله مات أخوها عندنا ومش هنقولها علشان منفقدهاش هي كمان لانها مريضه سكر وضغط.

أم بتقولي ..ابني هيتحول هنا طلع ايجابي لو سمحتوا خليه ف الاوضه معايا ده صغير ومش هيستحمل .

بنت مصابه عندها ١٢سنه وبتقولي هو بابا عندكم .. قالوا لها هيروح ابو تيج .ويا مس احجزيني ف اوضه بابا .

طفله عندها سنه وأسرتها كلها معانا وبتقضي اول عيد ميلاد ليها معانا ف الحجر.

طفل عنده سنتين ومامته وأترعب مننا ومن لبسنا اول ما شافنا ف العزل ودخل في نوبه بكاء متواصل .

مريضه مسنه طلعت سلبي الحمد لله وبتقولي كلمي مرات أبني يا مس وقوليلها أني كويسه وخفيت ومش هعدي ولادها .💔

حالات مرعوبه لوحدها فى العزل ومش معاهم حد من اهاليهم .

مرضي جايين من محافظات تاني وبيسالونا احنا فين دلوقت.

مريضه جايه هي و٦من اسرتها ايجابي بعد ما جوزها أتوفي فى نفس اليوم بكرونا .

ويضيف الدكتور عبد الرحمن ، حالتنا النفسيه اللي أتدمرت وأنتوا زي ما أنتوا فى الشوارع والعزومات ومش مهتمين أساسا

أستهتاركم باروحكم وأرواح أسركم اللي هتتحاسبوا عليهم

دموع المرضي الرجال قبل النساء فى الحجر لما يعرفوا أن اهالهم طلعوا ايجابي

حاسين أنتوا ولسه زي ما أنتوا

فكروا كويس

محدش هيندم غيركم بعد كده

خليكوا فى بيوتكم لاننا معندناش اماكن تاني لمصابين جدد.

 

نبذة عن الكاتب

مقالات ذات صله