عودة الفنانة علا غانم إلى الساحة الفنية: تفاصيل أعمالها الجديدة وتطلعاتها في التمثيل والإنتاج

كشفت الفنانة علا غانم تفاصيل أعمالها الجديدة، بعد مشاركتها في فيلم أولاد حريم كريم مع الفنان مصطفى قمر، الذي شهد عودتها بعد غياب ما يزيد على 7 سنوات عن مجال التمثيل.

وأشارت علا غانم خلال تصريحات إذاعية، إلى أنها ستخوض دراما رمضان 2024 بأكثر من عمل درامي، ومازالت تلك الأعمال في مرحلة الكتابة، بينما تستعد للمشاركة في فيلم سينمائي جديد مع الفنانة إلهام شاهين، موضحةً أنها أُعجبت بالفكرة كثيرًا، ولكن مازال العمل في مرحلة الكتابة أيضًا.

وعن عودتها للاستقرار في مصر، قالت علا غانم: حابه أمريكا جدًا وحياتي ومستقبلي اللي رسماه لنفسي هناك ومبسوطة بإنجازاتي وقادرة أحقق ذاتي بمزاجي، يمكن أنا بصحى بدري جدًا هناك وبشتغل ساعات مرعبة لكن أنا بحقق ذاتي ولكن من خلال اختياري في الأدوار اللي شايفني فيها هناك بعمل اللي أنا بختاره، وباجي مصر على الشغل بس ومشاكلي الشخصية.

أما عن إمكانية خوضها مجال الإنتاج، أردفت علا غانم: لما اخلص حلمي اللي بحققه في أمريكا ممكن أرجع وأنتج في مصر، معرفش أعيش من غير هدف وده اللي مخليني عندي شغف وحماس لكل حاجة بعملها، وأنا باخد قرار إجازة مفتوحة من التمثيل ده؛ لأني كنت شايفه حلم بيلمع بعيد في أمريكا، وفكرة إني أتحول لبيزنس ومن اختبر مخي في الشغل مش كفنانة وتقديم أدوار، ولكن كنت عايزة أختبر نفسي في مجال آخر.

وتابعت علا غانم: اليوم اللي خلصت فيه ظل الرئيس كنت ماشية بكل شنطي ومحضرة 20 شنطة شفت إني حققت اللي عايزاه في مصر، وطول الوقت عايشة مع نفسي في مباراة.

وعن احتفالها بعيد ميلادها، أضافت علا غانم: مبحبش احتفل بعيد ميلادي على فكرة ولما حد بيقولي كل سنة وإنتي طيبة بعتبره بيشتمني وبيعلم عليّا مش ببقى مبسوطة وبحب اتناسى اليوم ده؛ لأني بشوفه عداد، البني آدم ماهو إلا تجارب وبطريقة أو بأخرى لازم تعيشها وأنت مبسوط، وكمان أنا مبحبش امشي جمب الحيط وبحب أعوم وأنط عشان أحس إن حياتي جذابة ولو مشيت جمب الحيط هزهق.