هادي الباجوري يرد على انتقادات داليا شوقي في مسلسل “سفاح الجيزة”: تعليقات الجمهور مبالغ فيها

علق المخرج هادي الباجوري، على الانتقادات التي طالت الفنانة داليا شوقي، بسبب أدائها في أحد مشاهد بمسلسل سفاح الجيزة، معربًا عن استيائه من رد الفعل العنيف على حد قوله.

وقال هادي الباجوري، في لقائه بـ برنامج تفاعلكم:الجمهور بتاعنا بيبقى ماسك كورباج شوية،  يعنى داليا في أول 4 حلقات كانوا الناس طايرين بيها وشايلينها على دماغهم من فوق، ولما عملت مشهد حسوا إنها بالغت فيه مسكوا لها كورباج وسكاكين ودبحوها، مع إن إنتي لو اكتشفتي أن جوزك اللي متجوزاه بقالك 4 سنين قاتل 9 وكمان  خطف أختك وبيحبها رد فعلك ممكن يكون أي حاجة.

وتابع: إحنا السوشيال ميديا عندنا بقت مبالغة وقاعدين للناس على الواحدة، ولو البنت بالغت شوية في المشهد فأنا اللي مسؤول عن ده وأنا اللي كان ممكن أقولها تهدي، وأنا كنت مقتنع بـ أدائها وأنا شايف أنها ممثلة شاطرة ومش هطلع أقول ده على السوشيال ميديا، وأنا أسف إني هقول ده ولكن الناس بقت  تقول رأيها بشكل عنيف.

والدة داليا شوقي ترد على منتقدي ابنتها

وسبق، ردت منال الفطاطري، والدة الفنانة داليا شوقي على الانتقادات والهجوم، الذي تعرضت له ابنتها، بعد دورها في مسلسل سفاح الجيزة، حيث قالت في لقائها مع القاهرة 24: أنا كأم متأثرة وشُفت الانتقادات غير منصفة، رفقا وتقديرًا لمجهود البني آدم.

 

وتابعت: أنا شُفت تعليقات غير آدمية، أي إنسان عنده إحساس مش هيأذي شخص كدة، وأنا مبقتش أشوف التلعيقات السلبية والانحدار اللي بنشوفه، اللي عايز يقول حاجة ينتقد بشكل بنّاء وآدمي، بلاش يكون هدام، يا ريت نطبطب على بعض شوية.

أبطال مسلسل سفاح الجيزة

 

شارك في مسلسل سفاح الجيزة، عدد كبير من الفنانيين، ومنهم: أحمد فهمي، ركين سعد، صلاح عبد الله، باسم سمرة، داليا شوقي، جيهان الشماشرجي، وعدد آخر من الفنانين، والمسلسل من تأليف محمد صلاح العزب وإخراج هادي الباجوري.