الكاتبة امل محمود تكتب : اعراض زوجة تعيسة

أعراض زوجة تعيسة:
1- بتصحى من النوم كل يوم بضرب الجزمة ومن طقوس الصباح انها تلعن اليوم اللى اتجوزت فيه مع سلسفيل جوزها.
2- مش طايقة تعمل أى حاجة في الدنيا، لا تطبخ ولا تنضف ولا تشوف طلبات العيال.
3- تترمى على الكنبة أودام أى مسلسل تركى وتعيش بخيالها مع البطل الأمور الرومانسى اللى العلاقة بينه وبين جوزها زى العلاقة بين الطاووس والغراب.
4- لما جوزها يتكلم ممكن تبتسم في وشه ولسان حالها بيقول “الهى ربنا يريحنى منك يا بعيد”
5- احساسها تجاه نفسها “ونسيت أنى إمرأة”.
6- كل مكالماتها لأمها، أختها، أصدقائها عبارة عن شكوى من المأسوف على شبابه لدرجة ان ممكن حد من اصاحبها يقتله علشان بس يخلص من الصداع.
7- تلاقيها مطلوقة في البيت زى الفرسة الشايعة، منكوشة، لابسة هلاهيل أشبه بملابس بهاليل الحسين وبتدور على أى حد تمسك في خناقه.
8- تتقن النأوزة والتلقيح وتلاقيها كارفة على نجمة إبراهيم في ريا وسكينة.
9- بتاكل التلاجة كلها أو مابتاكلش أصلا.
10- مدمنة قهوة، بيبسى، لب، نفتلين بلى، أهو مدمنة أى حاجة وخلاص.

وراء كل زوجة تعيسة زوج مقصر في حاجات كتييير..